करोनाः श्रद्धा-सबुरीचे सूत्र; चला होऊया भयमुक्त

करोना विषाणू संसर्ग जगभरात तांडव करत आहे. सुरुवातीला चीनमधील एक शहरापुरता मर्यादित असलेला करोना जगभरात थैमान घालेल, याची कुणीच कल्पना केली नव्हती. जागतिक पातळीवर करोना बाधित आणि करोना मृत्यूने लाखांचा आकडा ओलांडला आहे. महासत्ता, विकसित देश तर करोनासमोर हतबल होताना दिसताहेत. आरोग्य यंत्रणा सर्वात सक्षम असणाऱ्या देशांनीही करोनाचा मोठा धसका घेतला आहे. भारतातही करोना बाधितांची संख्या १२ हजारावर गेली आहे. यातील सर्वाधिक करोना बाधित महाराष्ट्रात, मुंबईत आहेत. देशातील लॉकडाऊनचा कालावधी ३ मेपर्यंत वाढवण्यात आला आहे. अशा बिकट आणि गंभीर परिस्थितीत निराशा, नैराश्य येणे स्वाभाविक आहे. घरातील एखाद्या प्रसंगामुळे आपण खचतो. मात्र, हे तर देशावर आलेले मोठे संकट आहे. करोनाची भिती वाटू नये, सकारात्मकता राहावी, यासाठी काही गोष्टींचा अवलंब करण्याची, आचरण्याची नितांत आवश्यकता आहे.

संकल्प, संयम आणि समर्पण.

संकल्प, संयम आणि समर्पण या तीन अत्यंत महत्त्वाच्या गोष्टी आहेत. करोना मुक्त भारताचा संकल्प करणे काळाची गरज आहे. गेल्याच महिन्यात मराठी नववर्ष सुरू झाले आहे. तर काहीच दिवसांपूर्वी शीख बांधवांचे नववर्ष सुरू झाले आहे. या नववर्षांच्या तोंडावर करोनाचे संकट गहिरे झाले. त्यामुळे इंग्रजी नववर्षाला केला जातो, त्याप्रमाणे या नववर्षाच्या सुरुवातीलाही करोनाला पराभूत करण्यासाठी करोना मुक्त भारताचा संकल्प प्रत्येकाने केला पाहिजे.